Balozi wa Italia Afanya Ziara Tosamaganga Regional Referral Hospital, Aahidi Kuimarisha Ushirikiano

Tosamaganga Regional Referral Hospital (TRRH) imepokea kwa heshima kubwa ziara ya Balozi wa Italia nchini Tanzania, Mheshimiwa Giuseppe Sean Coppola, aliyefika hospitalini hapo kwa lengo la kujionea huduma za afya zinazotolewa na kuzindua rasmi mradi wa matibabu ya fistula unaotekelezwa kwa ushirikiano na shirika la Doctors with Africa – CUAMM.

Katika ziara hiyo, Mheshimiwa Balozi alipata fursa ya kutembelea maeneo mbalimbali ya hospitali, kukutana na uongozi pamoja na wataalamu wa afya, na kujionea kwa karibu maendeleo, mipango na ubora wa huduma za afya zinazotolewa kwa wananchi wa Mkoa wa Iringa na maeneo jirani.

Balozi Coppola alionesha kufurahishwa kwake kwa kiwango kikubwa na juhudi zinazofanywa na TRRH katika kuboresha huduma za afya, hususan katika matibabu ya kina na huduma za rufaa. Aidha, alipongeza ushirikiano uliopo kati ya hospitali na wadau wa maendeleo kutoka Italia, hususan katika eneo la afya ya mama na mtoto.

Katika hotuba yake fupi, Mheshimiwa Balozi aliahidi kuendeleza na kuimarisha ushirikiano kati ya Serikali ya Italia na Tosamaganga Regional Referral Hospital, akisisitiza umuhimu wa kuwekeza katika mifumo ya afya ili kuboresha ustawi wa jamii kwa ujumla.

Uongozi wa TRRH ulitoa shukrani za dhati kwa Serikali ya Italia, Doctors with Africa – CUAMM, na wadau wengine wote kwa mchango wao katika kuboresha huduma za afya, na kusisitiza kuwa hospitali itaendelea kushirikiana na wadau mbalimbali kwa lengo la kutoa huduma bora, salama na zenye viwango vya kimataifa.

Ziara hii ni hatua muhimu katika kuimarisha mahusiano ya kimataifa na kuendeleza dhamira ya Tosamaganga Regional Referral Hospital ya kuwa kituo bora cha rufaa na huduma za afya kwa jamii.